"South Tuipui hi bialtu MLA nei vannei bial ni zel turin kan inbuatsaih ka duh" -J.Lalchhuana

 Hnahthial, 12th September 2023 : MNF West Block South Tuipui A/C huamchhunga MNF party hruaitute chu nimin khan Horeb Conference Hall, Hnahthial-ah thukhawmin tunkar Zirtawpni (15.9.2023) hian RD Coference Hall, Hnahthial-ah bialtu MLA leh Minister ni bawk Dr.R.Lalthangliana hovin Block Meet neih nise tiin ruahmanna hrang hrang an siam nghal a ni.

He hunah hian Pu J.Lalchhuana, President, MNF West Block South Tuipui A/C chuan infuihthar thu sawiin "Hnahthial leh a chhehvel mipui ten hmasawnna chak leh awlsamna nasa zawk kan neih a, leirem kan rah theihna turin theihtawp chhuahin District kan ngiat a, min petu leh min tih puitlin sak mektu chu Pu Zoramthanga kaihhruai sorkar hi a ni a, hmabak tih tur tam tak la awm pawh hi a hringtu ngei MNF hi a sorkar leh a ngai a ni" tiin Hnahthial District hmasawnna hrang hrang leh District Pisa pakhat din tur pawhin sum a ngaih tam thu sawiin "Covid-19 hrileng leh harsatna hrang hrang avangin Sorkar-in sum harsatna tawk mahsela Hnahthial District hmasawnna hi a kal chak hle a, mipuite pawh hian kan hmasawnna hi kan ngaihtuah peih a, kan hriat thar fo ka duh a ni" tiin Hnahthial mipuite duhna leh rualawhna ti hlawhtlingtu MNF party chu a sorkar leh ngei theih nan theihtawp chhuah zel turin kalkhawmte a chah a ni

South Tuipui bialtu MLA Dr.R. Lalthangliana chu bial dangte pawhin an awh thu sawiin Pu J.Lalchhuana chuan "kan bial leh District tih changtlunna kawngah emaw bial mipui ten dam loh mangan, harsatna leh mamawh kan neih nikhua in bial Nu leh Pa nih a tlinin theihtawp a chhuah thin a, Kohhran leh khawtlanga pawl hrang hrangte a ngai pawimawh hle a, bial dangte awh thamin hma a la thin a ni" tiin ram pum ang pawhin Minister tha leh chak a hriat a nih thu a sawi a, "South Tuipui hi bialtu MLA nei vannei bial ni zel turin kan inbuatsaih ka duh a ni" a ti bawk

He hun hi Pu B.Lalromawia, Vice President, MNF West Block South Tuipui A/C chuan kaihruaiin kalkhawmte chuan kumin 2023 inthlanah South Tuipui bial chu Minister bial ni zui leh ngei turin hnehna chang tura tan lak an tum thu leh a chak ngei pawh an inbeisei hlawm thu an sawi a ni