Hnahthial, 20th May 2023 : Mizoram Board of School chuan nimin khan Higher Secondary School Leaving Certificate (HSSLC) Examination 2023 result a ti chhuak a, Science stream-ah Hnahthial rawlthar Jonathan C.Lalhruaitluanga, Chanmari Hnahthial chuan St.Joseph HSS Aizawl atangin Mark 500-ah 458 hmu in Mizoram pumah pakhatna dinhmun a luah
Rawlthar chhuanawm Jonathan C.Lalhruaitluanga hi Pu C.Lalduhawma leh Pi Zosangzuali, Chanmari, Hnahthial te fa 4 zinga upa ber dawttu niin Class-I thleng Nuchhungi English Medium School Hnahthial-ah a kal hnuin Class-II atanga Class VIII thleng Sapzari Memorial School Hnahthial-ah kal lehin Class IX atanga Class XII hi St.Joseph HSS, Aizawl atangin a chhuak leh a ni. HSLC (Matric) a Exam kum hian Mizoram pumah 8-na niin SS leh Science Subject-ah topper a ni nghe nghe bawk a ni
Kumin 2023 HSSLC (Science) bikah hian Exam beitu mi 3075 awmin heng zinga 2389 chuan hlawhtlinna an chang a, Hnahthial rawlthar Jonathan C. Lalhruaitluanga hian English-ah Mark 88, Mizo-ah 89, Physics-ah 94, Che-mistry-ah 93, Biology-ah 94 hmuin a pumpuiah pakhatna a ni.
KALAWN zawhna chhangin Jonathan C.Lalhruaitluanga hian a result a hriatin pakhatna a ni chu mak a tih thu leh lawmawm a tih thu sawiin a nu leh pate a hriatchhuah bakah Pathian hnenah lawmthu a sawi a ni. MBBS zir a tum thu leh hemi atan hian tunah pawh NEET result a nghah mek thu sawiin "tuna ka rilruah hi chuan Specialist ni tur thlenga zir ka duh a, rilru erawh inthlak thei niin Competitive lam pawh ngaihtuahna ah a awm tho" a ti. A lehkha zir kawngah hreawm tih chang nei ve thin mahse kum bul atangin inthlah dah lovin a zir thin thu leh Exam dawn hnaih chu ennawn nan a hman thin thu sawiin zan lamah zing dar 1:00 vel thleng a chhiar thin thu leh zing dar 6:00 velah thoin darkar 1:30 vel lehkha zir nan a hman thin thu a sawi bawk a ni
Jonathan C.Lalhruaitluanga hi Aizawl-ah awm mekin karleh lamah a rawn hawn hman beisei a ni
Comments
Post a Comment