South Tuipui bial draft Electoral Roll tlangzarh niin Polling Station 27-ah voter 15,551 awm mek

Special Summary Revision of Electoral rolls 2022 neih turah Nimin (1st November 2021) khan Hnahthial District bawrhsap leh District Election Officer ni bawk Pu R.Lalremsanga chuan a Office Conference Hall, Hnahthial-ah 29-South Tuipui A/C Draft Electoral roll tlangzarhin "kan district chhungah raltlan engemaw zat an awm a, kan u leh naute pawh nise foreigner an nih avangin Roll-a thun hi dan in a phal lo" a ti 

He huna inkhawm tawi hi SDO (Sadar) leh ERO ni bawk Pu Lalremruata Sailo chuan kaihruaiin District Bawrhsap Pu R. Lalremsanga chuan Electoral roll felfai tak neih chu Election Commission of India (ECI) duh dan a nih thu leh chumi tihlawhtling tur chuan official te, Political Party te, Booth Level Officer te leh khawtlanga voters zawng zawngte mawhphurhna a ni tih a sawi a, "kan khua leh tui ngei South Tuipui Constituency chhung a mi kum 18 tling chinte chu kan thun tur a ni" a ti.

   

He huna Election Officer Pu Lalneihthanga Colney tarlang danin nimin (1st Nov) atanga ni 30.11.2021 chhung hian Electoral Roll a in thunluh leh paih tur nei emaw, diklo lai siamtha duh leh hmun danga insawn duhte chuan mahni bialtu BLO-te hnenah Forms - 6, 7 8 & 8A la chhuakin 01.11.2021-30.11.2021 chhungin Valid Proof documents kimchang nen dilna thehluh tur a ni a, hun tiam ral hnu a dilna chu pawm theih a ni tawh lo a ni. 

29-South Tuipui Draft Electoral roll tlangzarh takah hian  Polling Station 27-ah voter 15,551 awmin mipa 7,629 leh Hmeichhia 7,836 an ni a, mipa leh hmeichhia inthlauhna hi voter 205 a ni. Service Voter 86 a awm bawk.  Polling Station 27-ah Hnahthial-IV Polling Station chu voter tam berna niin voter 1,130 an awm a, New Kawnpui Polling Station chu voter tlemna ber niin  voter 50 an awm a ni.

 Khawpui Fai ni turin Hnahthial mipuite an inbuatsaih nasa

Mizoram khawpui Fai inelna kalpui mekah Hnahthial khawpui chhung veng hrang hrang te an tang hlawmin veng chhung tih fai leh cheimawi hnatlang thawk an awm deuh reng a, mipuite rilru sukthlek pawh Faina lamah a kal nasa in Hnahthial khawpui chhung hmun hrang hrang te chu hmuh a nuam sawt hle a ni.

 

Hnahthial khawpui chhung veng hrang hrangin Faina beihpui a thlak te hi SDO (Sadar) leh DUDO ni bawk Pu Lalremruata Sailo chuan enfiah fo in khawtlang hruaitute chu hmalak ngaihna lai nia a hriatte a sawipui thin a, chak takin hmalakna hi kalpui a ni.

 
Nimin pawh khan Peniel Branch YMA  hnuaia Chawngbawla Section chuan Peniel veng Ambassador leh VC Vice President ni bawk Pu V.Lalbiakliana hovin Hnahthial chhimlam kawngpui (NH 54) dung thenfai hnatlang an thawk a, nizan khan Electric Branch YMA hnuaia Decoration & Sanitation Committee chuan an veng chhung Footpath leh hmun thenkhat rawng hnawih hnatlang an thawk a, an VC ten an tawiawm bawk a ni 

Hnahthial-a Sorkar Pisa hrang hrangte pawh chan insemin khawpui chhung chei hna an thawk thin a, YMA Branch thenkhate pawhin Branch anga hnatlang an neih thin bakah Section fai inelna ang ten an kalpui bakah YMA chhang ang ten bawlhhlawh thenfai hnatlang an thawk thin bawk a ni. 

  "Khawpui vawn fai hi a chhunga awmte mawh a ni a, 

ti faitu i nih loh pawhin ti bawlhhlawhtu ni suh"

 

 

Hnahthial-ah October 2021 chhungin lirthei khalh dan bawhchhia mi 49 man an ni

Hnahthial Traffic Police te chuan thla kalta (October 2021) chhung khan lirthei  khalhtu dan bawhchhia mi 49 mani heng mi hmeite pawisa chawi tlingkhawm hi Rs 19, 700 a ni

October 2021 chhunga Hnahthial Traffic Police ten lirthei khalh dan bawhchhia an man zinga mi 41 te chu 2 wheeler khalh tute anni a, 4 wheeler lirthei khaltu mi 8 an tel bawk. Hnahthial Police te chuan lirthei khalh tute chu dan (Motor Vehicles Act etc) zawm hram hram turte, zan lam curfew(8pm to 4am) zawm  turte leh  a bik takin 2-wheeler khalhtu ten motor document felfai tak nei turin an ngen nawn tih an tarlang a, Sorkar lama thuneitu te leh khawtlang hruaitu te nena inbe rawn chungin hun remchang hmasa berah Hnahthial khawpui chhungah No Tolerance Week hman nise tiin SP hnenah rawtna an thlen  bawk a ni.

 

Hetih lai hian Hnahthial SP Pu Lalbiakkila ruahmanna in Hnahthial District chhung, Tuichangral khaw hrang hranga Myanmar Raltlan awm mekte chu vawiin leh naktuk hian Dan leh Hrai chungchangah zirtirna pek an ni dawn a, hetiang hian ruahmanna siam a ni :-

 

Hnahthial District-ah Covid-19 hri kai enkawl lai mi 163 awm mek; MO-in RAgT chungchangah hriattirna ti chhuak

 

Hnahthial District chhunga Covid-19 hri kai enkawl lai mi 14 te chuan nimin (1st Nov.2021) khan enkawl an nihna hmun dam takin an chhuahsan a, hri kai hmuhchhuah thar mi 10 awm thungin chungte chu Peniel-6, Chanmari-2, Bazar -1 leh veng kan hriat loh 1 an ni. Heti hian tun dinhmunah Hnahthial District chhunga Covid-19 hri kai enkawl lai mi 163 an awm mek a ni

Hetih lai hian niminpiah khan Dr.Lalrengpuii Ralte, Medical Officer District Hospital, Hnahthial chuan RAgT chungchangah ruahmanna siam a nih thu hetiang hian a tarlang :-

1.    OPD a damlo inentir tur reng rengte chu Covid Vaccine Full dose la tawh Symptom nei lo an nih chuan RAgT tih loh tur a ni. Amaherawh chu Vaccine Full Dose an la ngei a ni tih chianna Certificate an nei ngei tur a ni. Certificate an neihloh chuan RAgT tih tho tur a ni ang.

2.    Triage Point ah uluk taka Screening neih tur a ní a, Symptom nei chu Doctor-in tul a tih dan a zirin RAgT hmanga endik an ni ang.

3.    Damlo emergency (Casualty) a inentir turte chu kan kal dan pangngai anga la kalpui tur a ni ang.

 

 

 

 

Infiamna lama tuimi tan dil theih

 

Hnahthial Block Sports Committee thuchhuahin a tarlan danin Sport lama tui mi (Mipa leh Hmeichhia) tan Khelo India State Centre of Excellence, RG Stadium Mualpui Aizawl a lut tur thlanna neih ani dawn a, a dil duhte chuan Director Sports & Youth services, MINECO Khatla Aizawl-ah Dt 10.11.2021 thleng dilna form lak theih a ni e.
Sport Discipline :-
1.Boxing (Boys & Girls) 50 Seats each
2.Judo (Boys & Girls) 50 seats each
3.Weightlifting (Boys & Girls) 50 seat each.

 

 

 

Faina leh Thianghlimna lama hmasawn nan Hnahthial District Sanitation Committee din a ni

 Hnahthial District Bawrhsap Pu R.Lalremsanga chuan nimin khan Hriattirna ti chhuakin Hmasawnna leh Changkangna hi Faina leh Thianghlimna nen kalkawp tlat leh inzawm lat a nih thu a tarlang a, District hmasawn, changkang leh hrisel kan nih theih nan District Administration chuan Faina leh Thianghlimna kawnga nasa taka ke pen tur leh hma la turin Hnahthial District Sanitation Committee a hnuaia mi ang hian a din a nih thu a tarlang bawk :-

Chairman : Deputy Commissioner, Hnahthial District.
Vice Chairman : Additional Deputy Commissioner, Hnahthial District
Secretary : District Urban Development Officer. Hnahthial

Members :-
1) Superintendent of Police, Hnahthial District.
2) i/c Medical Officer, District Hospital, Hnahthial.
3) Executive Engineer, PHED, Hnahthial
4) District Education Officer. Hnahthial.
5) District Horticulture Officer, Hnahthial.
6) District Agriculture Officer, Hnahthial
7) District Sericulture Officer. Hnahthial.
8) District Veterinary Officer, Hnahthial.
9) Block Development Officer, Hnahthial
10) Sub-Divisional Officer, P & E Dept., Hnahthial.
11) Sub-Divisional Officer. Public Work Dept.. Hnahthial.
12) Child Development & Project Officer, Hnahthial
13) President/ Secretary, Village Council Association. Hnahthial District.
14) President/Secretary, Sub-Headquarters, YMA, Hnahthial,
15) President/Secretary, Sub-Headquarters MHIP 16) President, MJA. Hnahthial,
17) Florist Association. Hnahthial

 

TERMS OF REFERENCE

1) Hnahthial District hi District Fai Ber kan nih theih nan Hnahthial District Sanitation Committee ten hma an la ang.
2) Faina leh Thianghlimna kawnga hma kan sawn zel theih nan Hnahthial District Sanitation Committee ten Hnahthial District thingtlang Khawfai Inelna a buatsaih ang.
3) Faina leh Thianghlimna tluantling kan neih theih nan Hnahthial District Sanitation Committee kaltlangin inzirtima a tam thei ang ber neih thin a ni ang.
4) Hnahthial District chhunga khaw hrang hrang te tun aia faina chungchang kan ngaihpawimawh theih nan leh hma kan sawn zel thelh nan NGO, Media leh Kohhran pawl hrang hrangte nen thawhho dan kawng an ngaituah ang.