KAYAKALP 2021 hmachhawn turin Hnahthial-a Sorkar Pisa, VC leh Pawl hrang hrang ten hmalakna kalpui dawn

Hnahthial-a Sorkar Pisa hotute, VC leh NGO hrang hrang hruaitute bakah MJA aiawh te chu nimin khan Hnahthial District Core Committee on Kayakalp Chairman leh District bawrhsap ni bawk Pu R.Lalremsanga kaihhruaiin OPD building-ah an thukhawm a, Damdawi In fai leh thianghlim thlanna KAYAKALP neih tur-ah District Hospital Hnahthial tan theihtawp chhuah ho nise an ti.

 

Meeting kaihruaitu District bawrhsap chuan Hospital chu mipuite ta a nih thu leh mi rethei ber atanga mi hausa berin an mamawh a nih thu sawiin "district hospital thianghlim tak leh felfai taka enkawl pawh mipuite hian kan mawhphurhna a ni tih kan hriat a tul" a ti a, Kayakalp chu Hospital fai leh titha inelna a nih thu leh tanrualna tur a nih avangin department dangte pawh theihtawp chhuah a tawiawm turin a sawm a, bul tan nan DC office chuan Rs.10,000 an hlan nghal dawn tih a sawi bawk a ni

He hunah hian Kayakalp Core Committee, Secretary Dr. R. Lalsanglura MO  chuan Kayakalp awmzia leh endik dan hrang hrang bakah hmalakna tur langsar zualte chu Power Point hmangin kalkhawmte a hrilhfiah bakah Pawl hrang hrang hruaitute leh Sorkar Pisa hotu kalkhawmte chuan  a theihtawp chhuaha tanpuina an inhuam thu an sawi hlawm bawk a ni

Chanmari khawtlang in Raltlan chenna In tur sak sak leh dawn

Chanmari veng Hnahthial chuan an veng beltu Myanmar Raltlan te tan chenna In an sak sak leh dawn a, nimin khan Rotlang E ramah Mau sah hnatlang thawkin LPK trip khat an la a ni.

 

 

Chanmari hian Raltlan te chenna tur In hi pahnih (2) sak sak tawhin chhungkaw 5 luah theih turin an pindan sak a, vawiin (5.11.2021) atang hian In pakhat sak hnatlang an thawk leh dawn a ni. Chanmari Raltlan Committee Chairman leh an VCP ni bawk Pu K.Lalremliana chuan Rotlang E khuain an ram chhunga Mau lak an phal sak avangin lawmawm a tih thu leh an vengchhung In tinah Dap pathum theuh an intuk thu a sawi bakah DC Office lamin Silpouline an pek dawn thu a sawi bawk a ni. 

 

 

Hetih lai hian Hnahthial District Raltlan Committee chuan nimin khan Khawhri khuaa Raltlan te chhawmdawlna atan Buhfai bag 15 leh Mutbu thahnem tak an pe bawk a ni
 

Hnahthial District Bawrhsap Pisa chhinchhiah danin nimin khan Cherhlun-ah mi 3 luh belhin tun dinhmunah Hnahthial District chhungah Raltlan mi 2313 awm mekin heng zingah hian chhungkua 419 an tel a ni. Khaw hrang hranga Raltlan awm zat chu :- Thingsai - 903, Cherhlun - 188, Bualpui H - 155, Ngharchhip - 169, New Ngharchhip - 456, Tarpho - 67, South Chawngtui - 25, Khawhri - 62, Tuipui D - 35, Hnahthial North-I - 73, Hnahthial North-II - 33, Hnahthial South-I - 49, Hnahthial South-II - 19, Hnahthial South-III - 46, South Vanlaiphai - 8, Aithur - 14, Leite - 11 

 

 

 

Kanaan VC leh YMA tangkawp ten veng chhung thenfai hnatlang an thawk

Mizoram khawpui fai leh Hnahthial khawpui chhung veng fai inelna kalpui mek hmachhawnin Kanaan veng Hnahthial chuan nimin khan an VC leh YMA branch tangkawp buatsaihin an veng chhung tih fai hnatlang an thawk 

 

 

Nimina hnatlangah hian YMA member an thawk chhuak thain kawngpui (NH 54) dunga kawngba leh lane kawng tih fai hna an thawk a, an VC Pu RTC Lalsangluaia chuan hnatlangte ei leh in tur hi a tum sak a ni. 

 

 

Kumin 2021 Faina Hapta hman tan tirh October Ni 2 atang khan Kanaan veng hian an veng chhung thenfai leh cheimawina kawngah hmalakna an kalpui chho deuh reng a, Zing, Chhun leh Zanah hnatlang an nei thin a, veng pum huap hian vawi 2 leh YMA Branch Executive chin vawi vawi 20 zet an an hnatlang tawh a ni. Tunlai pawh hian an veng chhung bawlhhlawh bawm dahna tur siamin zan lamah YMA an hnatlang thin a ni. Bawlhhlawh bawm hi UD&PA lamin an pe dawn niin sawi a ni a, hemi dahna tur hi Thir chu VC ten tumin YMA-in welding hna an thawk thung a ni