Govt Hnahthial College atanga Graduate tharte lawmpuina hun hman a ni

Govt Hnahthial College chuan nimin khan an College Auditorium-ah Graduate tharte lawmpuina hun hmangin District bawrhsap Pu R.Lalremsanga'n khuallian niin a hmanpui a, "Zirna uar hi khawvel eng hmuhna a ni a, zirna uar lo ram leh khua chu an hnufual thin" a ti 

 

 

Khuallian Pu R.Lalremsanga chuan Govt Hnahthial College atanga zirlai 22 ten College chhuahsan thei tura hlawhtlinna an chang chu a lawmpui thu sawiin duhsakna a hlan a, mi puitlinga ngaih Graduate an nih tawh avangin an tih awm leh awm loh thliar thiam thin tura chahin "Covid-19 hrileng vangin zirna kalphung pawh buaiin online class kalte ngai mahse thiamna tak tak nei turin mahni kan pawimawh tih hriat reng a tul a ni" tiin Zirlai pass chhuak tharte chu inelna sang zawk hmachhawn tura inbuatsaih tur leh theihtawp chhuah turin a fuih a, "Hna leh eizawnna kawngah hian tih tak takna tel lo chuan hlawhtlinna a awm lo" a ti bawk.

Hnahthial District bawrhsap Pu Lalremsanga chuan District thar Hnahthial mipuite rawngbawl sak thei tura Sorkar-in a dah chu lawmawm a tih thu leh District fai ber ni tura hmalakna kalpui mek a nih thu sawiin Damdawi In fai inelna KAYAKALP-ah pawh Hnahthial District chhunga Damdawi In te chu tan lakpui an nih dawn thu a sawi bakah Zuk leh hmuam do kawngah te tan lak pui turin mipuite a sawm nghal bawk a ni.

 

  

Govt Hnahthial College-a Graduation day hmana hi an College SU Vice President Vanlalrinchana'n a kaihruai a, Principal Pu K.Lalsangluaia'n thu a sawi bakah Graduate thar mi 22 te hnenah hian lawmpuina thuziak an hlan bawk a ni

 

Govt. Hnahthial College hi kum 1979 a din niin tun dinhmunah Teaching Staff 29 leh Non Teaching Staff 11 an awm mek a, zirlai 179 an awm mek bawk a ni

 

  

 

Covid-19 laka mipuite him nan Hnahthial District chhunga hman tur inkaihhruaina ti chhuak

Hnahthial District chhungah mipuite Covid-19 hripui laka an him tlan theihna turin District bawrhsap Pu R.Lalremsanga chuan November ni 30, 2021 Zanlai dar 12:00 thleng huam turin nimin khan inkaihhruaina thupek a chhuah.

He inkhuahkhirhna hi Hnahthial District chhunga hman tur niin Village Level Task Force lehDistrict Level Enforcement Team te chu khauh taka kengkawh tura tih niin chungte chu :-

 A.   DISTRICT HQRS BIK INKAIHHRUAINA:

    Hemi hun chhung hian loh theih loh thilah lo chuan pawn chhuah leh inlenpawh loh tur a ni. Building khata in hrang hrang luahte pawh intlawhpawh loh tur a ni.

2.    Hemi hun chhunga District headquarters chhunga inkaihhruaia chu Deputy Commissioner’s office, Hnahthial Order No.F.20017/3/2021-DC(H) dt.18.10.2021 hnuaia tarlan ang hian kalpui chhunzawm ani ang.

3.    Covid Appropriate Behaviour (CAB)khauh taka zawm chungin Pathianni/Sabbath ni chhun leh zanah Biak-Ina leng zat chanve (50% seating capacity) aia tam lovin Kohhran inkhawm pangai neih phal a ni a, zing leh tlai tawngtai inkhawm pawh phal a ni. Inkhawm zawng zawngte list hi register vawn tur a ni. Amaherawhchu Biak In chhungah zaiho phal anilo.

    Activity hrang hrang tarlanahCovid Appropriate Behaviour (CAB) uluk taka zawm tur a ni a. Dawr, Sumdawnna hmun, Commercial Vehicle, adt – a thawk te hi a theih chin chinah Covid-19 Vaccine dose khat tal la tawh an ni tur a ni. 

 

B.    DISTRICT HQRS PAWN A HMAN TUR INKHUAHKHIRHNA TE:

 

Vaccination : Mipui vantlang kan lo him zawk nan Covid-19 Vaccine la la lo zawng zawngte chu Sawrkarin a thlawna vaccine lakna a ruattah te a hma thei ang bera vaccine la tura ngen leh beisei an ni.

 

Zin veivah chungchang : a)   Tul bikah chuan zin veivah phal ani. Zin veivah na hian mimal lirthei leh passenger phur lirthei (Commercial Passenger Vehicle) te hman phal a ni. 

 

b)   Lirtheiahte hian registration a seating capacity tarlan bak chuan phal a nilo. Lirthei khalhtute leh an phurh ten mask/hmai tuamna an vuah vek tur a ni. Passenger te hman tur hand Sanitizer an pai reng tur a ni. 

 

Veng/Khaw Bil Inkhuahkhirhna :  a)   Veng/khaw bil bik tana inkhuahkhirhna khauh zawk neih tul tihna a awm chuan, a chhan leh vang chiang taka ziakin VLTF ten Deputy Commissioner, Hnahthial hnenah rawtna an siam thei ang. 

 

b)   VLTF ten anmahni thuin veng/khaw bil inkhuahkhirhna hranpa curfew/ lockdown/Containment Area/ Restricted Area an puang tur a ni lo. 

 

c)   Kawngpuiin a paltlang khua/veng ten an khaw/veng kaltlanga khaw/veng danga kal tur zin veivak te leh an lirthei an dang tur a nilo.

 

Bungraw Chawkluh Chungchang: a)   State pawn/ District dang atangin bungrua lakluh phal a ni. Dawr neitu leh Motor Registration No., Driver leh Handyman Contact no. te uluk takin an chhinchhiah tur a ni. Bungraw phur motorah hian midang (passenger) an chuang tur a nilo. 

 

b)   State pawn atanga bungraw lak luh phurtu (driver leh handyman) te chu backload lak tur zawngin Mizoram hmun dangah an kal kual tur a ni lo. 

 

c)   Public Distribution System (PDS) hnuaia ration dawr/ retailer a pek chhuah tur buhfai, chini leh khawnvartui phur motor te chu FCS&CA Department in Delivery Order/ Despatch Challan a pek chhuah, la nung mek an ken chuan phalna hranpa ngailoin bungrua an thiar thei ang. 

 

d)   A chunga tarlan driver leh handyman te hian kawng laka harsatna an tawh thulah State Control Room (Toll free 1070, landline 0389-2342520, mobile 7628072785 leh watsapp 9366331931) leh Covid-19 (Medical) helpline number (Toll free 102, landline 0389-2323336, 0389-2322336 leh 0389-2318336)-ah telephone in an harsatna te an thlen thei ang.

 HREMNA DAN : He thupek zawm lo chu Disaster Management Act, 2005, Section 51 atanga 60, the Mizoram (Containment and Prevention of the spread of Covid-19) Act, 2020 hnuaia Section 5 leh IPC Section 188 hmangin hrem theih an ni.

 

           Zan Curfew thupek ti chhuak

Co   Covid-19 hrileng laka mipuite him nan Pu R.Lalremsanga, District Magistrate, Hnahthial District chuan niminpiah (1st.Nov.2021) khan thla hnih chhung atan Hnahthial khawpui chhungah zan dar 9:00 atanga a tuk zing dar 4:00 inkar chu Curfew thupek a chhuah

 

Veng chhung Faina leh Luidung Nungcha humhalh kawngah YMA Model Branch-in hmalakna kalpui zel

Hnahthial khawpui Faina beihpui thlak mekah Model Branch YMA hnuaia Section Pahnih -Dohawla Section leh Lianthiaua Section te chuan an Ambassador Pu T.Lalramliana hovin nimin leh nizan khan an veng chhung thenfai leh cheimawi hnatlang an thawk

Model Branch YMA hnuaia Dohawla Section hian nimin nileng khan an area chhunga tui luankawr leh Retaining wall tih fai leh hmun pawimawh lai chei hna thawkin nizan thleng khan an chhunzawm a ni. Lianthiaua Section pawh hian nizan khan an Branch YMA President Pu B.Remlalhruaia hovin pangpar khawina tur Pot siam hnatlang an thawk bawk a ni.

 

Model Branch YMA President Pu Mahruaia chuan an veng chhung tih faina kawngah kil hrang hrang atangin hmalakna kalpui a nih thu sawiin "kan VC ten thahnem an ngaiin sum pawh an seng nual tawh a, kan Ambassador-in theihtawp chhuah bawkin a hovin hnatlang thawh thin a nih a bakah, Sanitation & Beutification Committee bakah MHIP ang te pawhin hmalak thin a ni" tiin Mizo Pangpar chi hrang hrang - Zamzo, Derhken leh a dangte chu kawngpui ti hnawk lovin an chin nasat thu a sawi bawk a ni.

 Hetihlai hian Luidung nungcha humhalhna kawngah pawh thawhhlawk tak Model Branch YMA hian tunlai hi Sangha fuan hun a nih bawk avangi an Tuichang lui an humhalh chin chu vengin kar kalta Inrinni zan atang khan zantin an riak lut thin bawk a ni.  

 

Electric veng-in tih fai leh rawng hnawih hnatlang thawk leh

Hnahthial khawpui chhunga veng lian ber Electric veng chuan Faina kawngah hmalakna kalpui chho mekin nizan pawh khan an Branch YMA hnuaia Decoration & Sanitation Committee chuan an vengchhung hmun thenkhat tih fai leh rawng hnawih hnatlang an thawk a, LD Honda neitu Pu Lalhriatrenga chuan an rawng hnawih tur hi thahnem tak tum sakin an khawtlang hruaitute an lawm hle a ni 

 

 

Flying Squad duty ten Covid-19 dan bawhchhia mi 5 an man

Hnahthial khawpui chhungah Covid-19 hrileng a ziaawm theih nana Ni 28.10.2021 atanga naktuk Ni 4.11.2021 thleng awh tur 'No Tolerance Week' hman mekah nimin khan Flying Squad duty-te chuan Dawr leh Sorkar Pisa hrang hrang an enfiah bakah Hnahthial khawpui chhung hmun hrang hrang tlawh kualin Lirthei vei vak an endik bawk a, Covid-19 inkaihhruaina bawhchhi mi 5 an man a, heng mite pawisa chawi tlingkhawm hi Rs.500 a ni 

 

 

Hnahthial District-ah Covid-19 hri kai enkawl 180 chuang awm mek

Hnahthial District chhunga Covid-19 hrileng chuan ziaawm lam ala pan hlei thei lova nimin leh niminpiah khan hri kai leh kai loh endik mi 187 awmin heng zinga mi 35 te chuan hri an kai tih hmuhchhuah a ni a, chungte chu :- Peniel - 11, Electric - 3, Chanmari - 2, Model - 1, Lungleng - 2, Leite - 2, Muallianpui - 1 leh Pangzawl - 2 an ni. Heti hian tun dinhmunah Hnahthial District-ah hian Covid-19 hri kai enkawl lai mi 188 an awm mek a ni

 

 "Covid-19 hrileng laka nang leh i chhungte, Khawtlang a him theih nan Mask vuah theihnghilh suh"