Dr.Thangtea'n a bial chhung a AAY leh BPL chhungkua te Ration Buhfai khul sak dawn

South Tuipui bialtu MLA leh Health Minister ni bawk Dr.R.Lalthangliana chuan a bial chhunga AAY leh BPL chhungkua te chu Krismas chibai buk nan Ration Buhfai December 2021 Quota a khul sak vek dawn tih South Tuipui Block-I MNF hruaitute a hrilh.

 

 Hemi chungchangah hian Bialtu MLA Dr.Thangtea hian Lunglei leh Serchhip DCSO te pawh be fel tawhin DCSO te hi an inpeih fel vel leh  buhfai hi pekchhuah nghal tura tih niin karleh chhung khi chuan mipui ten an lak theih beisei a ni.

South Tuipui Block-I MNF chuan "kawng hrang hrangah bialtu MLA Dr.Thangtea'n party mi leh sa thliar lova bial pum a ngaihtuah zia a ti lang thin chu thlamuan thlak an tih thu leh Bial Nu leh Pa nih a tlin zia a lang a ni" tiin chhuanawm an tih thu an sawi a ni.

 

 DC Pisa leh PHED chungah Hnahthial S-III Raltlan Committee an lawm

Hnahthial South-III Raltlan Committee chuan Myanmar buaina avanga an khawtlang beltu Raltlan te chenna In tur nimin khan sak sak lehin District bawrhsap Pu R.Lalremsanga chuan a hmunah tlawhin Pi Jennifer Vanlalhruaii Pachuau, SDC chuan a tawiawm a, khawtlang hruaitute nen hmalak zel dan tur an sawiho nghal a ni. 

District bawrhsap Pu R.Lalremsanga chuan Raltlan te chu tha tak leh fimkhur taka enkawl turin Hnahthial South-III khawtlang hruaitute chu a chah a, harsatna leh buaina an neih chuan inthlahrung lovin a hnena thlen thuai thin turin a hrilh nghal bawk a ni.

Hnahthial South-III VCP leh Raltlan Committee Chairman ni bawk Pu K.Lalremliana chuan Raltlan te tana an hmalakna, a hmun ngeiah District bawrhsapin a hmuhpui leh an mamawh leh harsatna an thlen ang te tih hlawhtlin sak an ni thin chu lawmawm a tih thu a sawi a, "kan District hotu ten kan rin phak bakin min ngaihtuah a, Silpouline pawh kan dil angin 5 min pe a, tui dahna (sintex) pakhat min pek tawh bakah a dang pakhat dah leh tula min hriatpui thu an sawi a, Current lakluhna senso pawh SDC-ah thehlut turin min ti a, kan thla a muangin kan lawm khawp mai" tiin KAILAWN zawhna a chhang a, PHED Hnahthial-in tui lak dan tur an ngaihtuah sak avangin an lawm thu a sawi bawk a ni.

 Tarlan tawh angin Hnahthial South-III Raltlan Committee hian Tawngtai Tlang thlen hma lawkah Raltlan te chenna In tur hi 2 sak sak tawhin chhungkaw 5 in an luah mek a, nimin atang khan chhungkaw hnih chenna tur In pakhat sa leh in vawiin hian luah luh theiha peihfel hman an beisei a ni 

  Covid-19 hri kai enkawl lai mi 139 awm mek

Hnahthial District chhunga Covid-19 hri kai enkawl mi 20 te chuan nimin khan dam takin enkawl an nihna hmun an chhuahsan a, nimin vek khan Covid-19 hri kai leh kai loh endik mi 51 zingah mi 4 - Peniel - 1, Venglai - 1, Leite - 1 leh South Vanlaiphai - 1 te chuan hri an kai tih hmuhchhuah a ni. Heti hian tun dinhmunah Hnahthial District chhungah Covid-19 hri kai enkawl lai mi 139 an awm mek a ni

 

Bualpui H YMA-in Sangha fuan an venghim

 Tunlai hi Sangha fuan hun a nih avangin Mizoram hmun hrang hranga YMA Branch hrang hrangte chuan Sangha fuan rut/man an awm loh nan an khaw bul Lui-ah zan rei tak thlengin an duty thin a, nizan hmasa (5.11.2021) pawh khan Hnahthial District chhung Bual 'H', YMA Branch te chu an khaw bul, Tiau lui-ah duty-in Sangha hi a fuan a, man phal lovin an venghim a ni.

 

Hnahthial District-a Raltlan awmna veng leh khaw hrang hrangah tanpuina sem a ni

Superintendent of Police Hnahthial kaltlangin nimin khan Pu Laldawngliana Chawnpui, Aizawl chuan Hnahthial District chhunga Raltlan te tanpuina atan Hnahthial District Raltlan Committee hruaitute hnenah Mutbu leh thawmhnaw thahnem tak a hlan a, Raltlan Committee ten lawmthu an sawi a ni.

 Nimin vek khan Hnahthial District Raltlan Committee chuan Tarpho khuaa Raltlan awm mekte tan Buhfai bag 15, Mutbu leh thuamhnaw engemaw zat an pe chhuak bawk 

Hetihlai hian Presbyterian Church of  India chuan tunhnai khan raltlan te tanpui nan cheng nuai 21 sem chhuakin Hnahthial Pastor bial-in Rs. 70,000 an dawn chu Bialtu Pastor Rev. H. Laldintluanga hovin Kohhran hruaitu ten Rs. 10,000 theuhin Hnahthial khawchhunga veng 4 - Chanmari, Model, Electric, Bazar bakah Khua 3- Khawhri, Tarpho leh Tuipui 'D'-ah te an sem chhuak a ni.

Hnahthial District chhungah hian nimin khan Raltlan 11 - Thungsai-ah 4, Ngharchhip-ah 1 leh New Ngharchhip-ah 6 an luh belh a, tun dinhmuna Hnahthial District a Raltlan awmzat chu 2082 niin heng zingah hian chhungkua 405 an tel a ni.