HNAHTHIAL THALAI PAWL-IN HMANRAW THA HMANG TURIN HMASAWNNA HNATHAWKTUTE AN NGEN

Hnahthial Thalai Pawl hruaitute chuan nimin khan Hnahthial khawpui chhunga hmasawnna hnathawh thenkhat chu a hmunah enfiahin hnathawktute chu rintlak leh belhchian dawl taka thawk turin a ngen.  

Rallang tlang-a Cheng Nuai 808 senga Hnahthial DC Office tur sak kal mekah Balu hman tur an chhawp mek chu Hnahthial Thalai Pawl hruaitute chuan hman tlak loh nia an ngaih avangin, hmang lo turin ngen a, balu supply tute hian an phur let leh nghal dawn niin hna enkawltu chuan Thalai Pawl hruaitute a hrilh a ni. He hnathawktu Contractor hi Ramlianthanga, Edenthar Aizawl niin Hnahthial Thalai Pawl chuan sawiin an enfiah lai hian a awm lo thung a ni.

RD Block ram chhunga Project Director DRDA Office tur sak mek pawh Hnahthial Thalai Pawl chuan a hmunah kal chilhin duhthu sam lo a awm nual tih an sawi a, tha taka hnathawk tur leh hmanraw tha hmang turin an ngen bawk a ni. He hna hi Rural Development Department atangin Pi TP-i, Khatla Aizawl in a enkawl mek niin Hnahthial Thalai Pawl chuan sawiin  ani hian hnam dang vai mistiri te hnenah Theka in a pe chhawng ve leh tih Thalai Pawl hruaitute hi an lo hrilh a ni.

District Urban Development Officer (DUDO) UD&PA Office tur pawh sak tuma hma lak mek a nih thu Hnahthial Thalai Pawl hruaitute chuan an sawi a, a tir atanga tha taka hna thawk tur leh a nih dan tur ang taka sak a nih theih nan an vil reng dawn tih an sawi bakah Hnahthial District chhunga hmasawnna hnathawh hrang hrang te chu a nih dan tur ang taka thawh a nih theih nan enfiah fo an tum tih an sawi bawk a ni