Hnahthial SP Pu Lalbiakkila'n Thingsai PS Volleyball Court a hawng

 Thingsai Police Station-a Volleyball Court siam thar chu nimin khan Hnahthial SP Pu Lalbiakkila chuan Khuallian niin a hawng a, "taksa hriselna hi mihring nuna pawimawh a nih avangin mahni taksa vawn uluk leh enkawl that hi mitin mawhphurhna a ni" tiin infiamna hmanga taksa sawizawi chu hriselna atana thil tangkai a nih thu a sawi a ni.

 Hnahthial SP Pu Lalbiakkila chuan Thingsai Police Station-ah Volleyball Court siam a ni chu lawmawm a tih thu sawiin "Police-te chu mipuite thlamuantu leh venghimtu kan nih avangin kan taksa leh rilru a hrisel that a tul a, chumi tur chuan kawng hrang hrangah kan intahhriam reng tul a, insawizawi leh Police nih chu thil inhmeh tak a ni" tiin Police-te hnathawh kawngah mipuite nen tanrual a ngaih fo thin thu a sawi a, Thingsai tlangdung phei chu International boundary hrula awm a nih avangin ruihhlo tawlh leh sualna chi hrang hrang do kawngah mipuite leh Police ten thawh hona tha an neih ngai lehzualin a hriat thu leh chutiang thawh hona tha leh inpawhna an neih theih nan Volleyball Court hawn thar pawh tangkai taka an hman a beisei tih sawiin mitinte chu dan leh hrai ngai pawimawh turin a chah nghal a ni. Tun hnaia Hnahthial District Police hmasawnna hrang hrang pawh tarlangin Hnahthial SP chuan Thingsai Police Station sak mek chu sak chhunzawm a nih theih nan sum bang la awm pawh release a nih thu a sawilang bawk a ni. 

Thingsai Police Station Volleyball Court siamna atan hian bialtu MLA Dr.R.Lalthangliana'n Rs.45,000 pein SP Pu Lalbiakkila'n Rs.12000/- a thawh bakah mi thahnemngai engemawzatin an thawh bawk a ni. Hawnna inkhawm hi Pu Vanlalbiaka Joute, Dy SP (Hqrs) leh Hnahthial SDPO ni bawk chuan kaihruaiin District Education Officer Pu Micky Lalenkawla chuan Khualzahawm niin a hmanpui bawk a, Hnahthial Police leh Thingsai Police bakah Thingsai leh Bualpui H ten Exhibition match an khel a, ruai nen hlim takin hun an hmang a ni. 

 Hnahthial District Raltlan Committee-in khua 7 a Raltlante dinhmun an enfiah

Hnahthial District Raltlan Committee (HDRC)hruaitute chuan nimin khan an Chairman Pu B.Lalhmingliana hovin Hnahthial District chhung Tuichang ral khaw hrang hranga Myanmar Raltlan awmna khua 7 tlawhin khawtlang hruaitute nen inkawm hona an nei nghal a, raltlante chhawmdawlna kawnga thawhho dan tur an sawi ho a ni.

HDRC hruaitute chuan Raltlan tam zawkte chu Zo hnahthlak an nih bakah mihring mihrinna atanga lainat taka khaw hrang hrangin an lo tuamhlawm chu lawmawm an tih thu sawiin fimkhur tak leh ruahmanna fel tak nena inenkawlna kalpui atul thu an sawi a, harsatna awmtheite sukiang tlang tur leh kawng hrang hranga thawk ho turin khawtlang hruaitute chu an sawm bawk a ni. 

 HDRC hruaitu ten nimina khua an tlawha Raltlan awm zat chu hetiang hi a ni:-
1. Bualpui 'H'            163
2. Thungsai                600+
3. Cherhlun                172
4. Ngharchhip            169
5. New Ngharchhip    345
6. Khawhri                  61
7. Tarpho                    90

Hnahthial District Raltlan Committee hruaitute chuan nimina Raltlan an tlawhte hian Buhfai, Mutbu leh Tui dahna an mamawh hmasa niin an hriat thu KAILAWN an hrilh a ni.

 

 

Hnahthial District bawrhsap-in AH&Vety Deptt hmun hma a enfiah

Hnahthial District Bawrhsap Pu R.Lalremsanga chuan nimin khan Hnahthial-a AH & Vety Dept tlawhin District Veterinary Officer, Office hmun tur leh Hospital hmun tur te a enfiah

Hnahthial District bawrhsap hi Dr.C.Sanghluna, VO leh a thawhpui ten lo dawngsawngin hmalakna tur pawimawh  kawng hrang hrangte a sawiho a, AH & Vety dept. Hnahthial chuan hmunhma an nei tha hlein a hriat thu leh Hospital dinna tur pawh dawl zo tura a ngaih thu District bawrhsap chuan a sawi a ni.

Hetihlai hian nimin khan Hnahthial-a Veterinary Officer hnathawk mek Dr.C.Sanghluna chu Senior Grade-ah a kaisanna order chhuakin Chief Veterinary Officer Lawngtlai-ah awm tura tih nimahsela thu leh awm hma chu District Veterinary Hospital Hnahthial-a thawk chhunzawm tura tih ani thung 

Hnahthial District-ah Covid-19 vaccine pechhuak tha

District Hospital Hnahthial huamchhunga Covid-19 vaccine la la lo -khumbet a damlo, Vohbik te leh rilru lama harsatna neite zawn chhuah hna vawiin hian neih a ni dawn a, heng mite hi hun remchang hmasa berah Vaccine hi pek tum an ni.

 District Hospital Hnahthial huamchhungah hian Vaccine pek dan dinhmun a tha thawkhat hle a, Health Care Worker 179  leh Frontline worker 241 ten dose khatna leh dose hnihna an la vek tawh a ni. Kum 18 leh kum 44 inkarah dose khatna la tawh mi 3624 awmin dose hnihna la mi 3160 an awm a ni. Kum 45 leh kum 59 inkarah dose khatna la mi 2172 awmin dose hnihna la mi 1978 awmin kum 60 chin chunglamah dose khatna la mi 726 an ni a, dose hnihna la mi 724 an ni.  Heng bakah hian Mop up round vawi hnih neih tawh niin round hmasa zawkah dose khatna la mi 1216 awmin dose hnihna la mi 856 an awm a, round hnihnaah dose khatna la mi 104 awmin dose hnihna la mi 385 an awm bawk a ni.

Heti hian District Hospital Hnahthial huamchhungah hian Covid-19 vaccine, dose khatna pek tawh mi 8543 awmin dose hnihna pek tawh mi 7138 an awm bawk a ni. An target 8597 atanga chhutin dose khatna pe tawh hi za-ah 99 niin dose hnihna pek tawh hi za-ah 83 an ni bawk

 

 

Hnahthial District-ah Covid-19 hri kai enkawl lai 200 chuang leh tawh ; Covid-19 kaihhnawihah MO-in hriattirna a ti chhuak

Hnahthial District chhungah Covid-19 hri kai enkawl lai mi 22 te chuan nimin khan dam takin enkawl an nihna hmun an chhuah san a, nimin vek khan sample endik mi 169 zinga mi 38 :- Peniel - 12, Electric - 11, Chanmari - 2, Venglai - 3, Model - 4, Darzo - 4 leh Pangzawl - 2 te chuan hri an kai tih hmuhchhuah a ni. Heti hian tun dinhmunah Hnahthial District chhungah hian Covid-19 hri kai mi 212 an awm mek a ni

District Hospital Hnahthial OPD Staff pakhat chu nimin khan Covid-19 hri kai tih hmuhchhuah a nih avangin vawiin (Inrinni) hian OPD chu tihfai leh tih thianghlim (disinfect) a ngai dawn a, khar a nih tur thu Medical Officer Dr.Lalrengpuii Ralte chuan tarlangin Emergency Case chu Casualty ah inentir tur a ni

Hetihlai hian Covid-19 Symptom nei ni a inhria leh mahni inrinhlelhna neite chuan Direct-a OPD a inentir tura kal nghal mai lovin an awmna area VLTF hruaitute hnenah in report hmasak zel tawh tur a ni tih nimina Medical Officer thuchuah chuan tarlang bawkin VLTF hruaituten Contact Tracing i/c Pu C. Lalhmingmuana hnenah hriattirin VLTF ten nen ruahmanna siam zel tawh tur a ni.

Mahni inrinhlelhna nei leh Covid-19 kaihhnawiha Doctor rawn duh chuan a hnuaia Doctor te hi a theih hram chuan Phone call lovin Whatsapp Message in emaw rawn thin tur tih tarlan a ni bawk :-

1. Dr. Esther Lalrintluangi Ph. No. 8131960274
2. Dr. K. Lalnunsiami Ph. No. 8414915996
3. Dr. S. Malsawmtluangi Ph. No. 8415988297 

 

Hnahthial Town Road Management Committee din a ni

Hnahthial chu District khawpui thanglai mek a nih avangin hmathlir thui tak neih a tulin Khawpui chep leh tawt tak a nih loh nan Hnahthial Town Road Management Committee hetiang hian din a nih thu nimin khan District bawrhsap Pu R.Lalremsanga chuan thuchhuah siamin a tarlang :-

Chairman : Deputy Commissioner, Hnahthial District.

Vice Chairman : Addl. Deputy Commissioner, Hnahthial District..
Secretary : Settlement Officer, Hnahthial District.

Members :-

1) Superintendent of Police, Hnahthial District.
2) Executive Engineer, PHED. Hnahthial.
3) District Urban Development Officer, Hnahthial.
4) Sub-Divisional Officer, Power & Electricity Deptt, Hnahthial.
5) Sub-Divisional Officer, Public Work Deptt. Hnahthial.
6) Block Development Officer, Hnahthial.
7) Sub-Divisional Police Officer, Hnahthial.
8) Presidents, Village Council, Hnahthial Town.
9) President, Mizoram Journalist Association, Hnahthial.
10) President, YMA Sub-Headquarters, Hnahthial.
11) President, MUP Sub- Headquarters, Hnahthial.
12) President, MHIP Sub-Headquarters, Hnahthial.
Special Invitees :
1) Pu J. Lalchhuana, Bazar Veng, (Prominent Citizen)
2) Pu K. Lalsangluaia, Bazar Veng (Principal, Govt. Hnahthial College)

 

 TERMS OF REFERENCE

1.    Hnahthial khawpui chhung kawngpui te zau zawka siam leh ruahman a nih theih nan hma an la ang.

2.     Hnahthial kawngpui chhung kawng zauh a nih theih nan mimal, pawl leh Kohhran ram te lak then a tul hunin dilna leh ngenna an siam thin ang.

3.    Vantlang kawngpui dipdal leh ti hnawk zawnga mimal bungrua/ motor dah hnawk te a thenfaina kawngah mawh a phur ang.

4.    Hnahthial Khawpui chhungah tuihawk luankawr (side drain) leh slab culvert te siam belh leh hmalakna kawngah mawhphurtu a ni ang.

5.    Kawngpui kama thlai leh huan siamte en felin, a senghawi ah te mawh a phur ang.

6.    In sa thar tur apiang ten an duh dan ang zawnga in sa ringawt lovin Hnahthial Town Road Management Committee leh Surveyor te enpuina hnuaiah chauh hma an la thei ang.

7.    Lirthei nei thar tur ten Motor dahna tur Garage felfai an neih leh neih loh en fel te chu Hnahthial Town Road Management Committee mawhphurhna a ni ang.