HNAHTHIAL DISTRICT CHHUNGA RALTLAN TANPUI TUR TEN RALTLAN COMMITTEE HRIATTIR THIN TURIN NGEN
Myanmar buaina avanga Hnahthial District chhunga raltlan te chhinchhiahna fel fai a awm theih nan leh raltlan ten rualkhai zawka tanpuina an dawn theih nana Hnahthial District bawrhsap leh Superintendent of Police ruahmanna hnuaia VC leh NGO ten an din, Hnahthial District Raltlan Committee chu nimin khan an Chairman leh YMA Sub-Hqrs. President ni bawk Pu B. Lalhmingliana kaihhruaiin YMA Sub-Hqrs. Office Hnahthial-ah an thukhawm a, Raltlan chungchanga hmalakna tur tam takah sorkar anga inrawlh a rem lohna tam tak a awm avangin DC leh SP thurawn angin Hnahthial District Raltlan Committee chu din a nih thu leh anni lam pawh an inhuamna a thui thu tarlan a ni.
Hnahthial District chhung khaw hrang hranga Raltlante mamawh leh dinhmun chu a inan loh avangin rualkhai tak tanpuina an dawn theih nan tanpuina pe turte chu Raltlan Committee hriattir hmasa thin se an duh thu meetinga-ah hian tarlan niin mahni kal remchang lova tanpuina sum pe duhte tan pawh Raltlante pual hian sum chhun luhna tur Mizoram Rural Bank-ah Account No. 97012884509 hawn a nih thu tarlan a ni bawk. Meeting chuan a remchang hmasa ber-ah Raltlan awmna khuate hi tlawh nise, anmahni chhinchhiah bakah an dinhmun chiang taka hriat tum nise an ti a ni.
Nimin khan New Ngharchhipah Raltlan 15 luh belhin Hnahthial South-III ah 13 an luh belh bawk am tun dinhmunah Hnahthial District-ah hian Raltlan 2298 awm mekin heng zingah hian chhungkua 405 an awm a ni
Comments
Post a Comment