Hnahthial District-ah Covid-19 hri kai 196 awm mekin 'No Tolerance Week' hman a ni bawk

 Hnahthial District chhungah Covid-19 hrilengin ziaawm lam a pan theih loh avangin District Level Committee on Covid-19 thurel angin nimin zing dar 6:00 atanga karleh Ningani tlai dar 6:00 thleng awh turin Hnahthial khawpui chhungah 'No Tolerance Week' hman tan a ni a, Flying Squad te duty-in khawpui chhung hmun hrang hrang an enfiah a ni

Hnahthial-a No Tolerance Week hman chhung hian Covid-19 hrileng darh zel loh nan Pawn chhuak ten Mask tha taka vuah tur tur niin Dawrkai reng rengin customer registration tha tak vawngin Dawr luhnaah Hand Sanitizer an chhawp ngei ngei tur a ni a, Tumkhat ah dawr chhungah Customer 3 (pathum) aia tam luhtir loh tur a nih thu leh House to House a bungrua zawrh/ chawhmeh zawrh/repairing works phal a nih loh thu Hnahthial District bawrhsap Pu R.Lalremsanga chuan thupek chhuahin a tarlan bakah Hnahthial-a mikhual zin vei vak reng reng pawhin CAB/SOP tha taka zawm tur a nih thu a tarlang a, VLTF member te pawh mahni area-ah dan bawhchhia an awm leh awm loh ngaihven tur leh a tih chian nan thla la zel turin a chah a, dan zawm tha lo te chu hrem an nih nghal zel tur thu a tarlang bawk a ni. 

Hnahthial khawpui chhunga No Tolerance Week hman tanni nimin khan ni dang angin mi vei vak an tam lova, Pisa leh Bank dawrtu pawh an tlemin  mitinin mask an vuak tha hlawm hle a, Dawrkai leh Bazar-a chawhmeh zuar te pawhin thupek an zawm tha a, Flying Squad duty-te pawhin dan bawhchhia man an nei lo a ni.

Hetihlai hian nimin khan Hnahthial District chhunga Covid-19 hri kai enkawl mi 13 te chuan enkawl an nihna hmun dam takin an chhuahsan a, Sample endik mi 360 zinga mi 35 :-  Electric - 6, Peniel - 8, Venglai - 5, Chanmari-5, Denlung - 2, Darzo - 2, Pangzawl - 5 leh Chhipphir - 2 te chuan Covid-19 hri an kai tih hmuhchhuah thar niin tun dinhmunah Hnahthial District-ah hian hri kai mi 196 enkawl an awm mek a ni

 

 

Hnahthial District-ah Raltlan an pung zel

Hnahthial District chhung Bualpui 'H' khuaah nimin khan Myanmar buaina avanga sahimna zawnga tlanluh belh mi 4 an awm a, tun dinhmunah Hnahthial District chhungah hian Raltlan 2339 awm mekin heng zingah hian chhungkua 413 an awm a ni. 

Hnahthial District bawrhsap Pu R.Lalremsanga chuan nimin vek khan Model veng Hnahthial-a Raltlante chenna hmun tlawhin an dinhmunte a zawtfiah a, harsatna an neih chuan inthlahrung lova sawi thin tur leh a theih ang anga tanpuina dappui an nih tur thu hrilhin a thlamuan a ni.