A pa damlo kan tura kal nimahsela midangte tana hun hmang nghal Dr.Sawmtea

A naupan lai atanga Pa a nih tawh hnu thlenga zirna kawnga mi chhuanawm leh entawn tlak, mi tlawmgai tak ni bawk Dr.F.Vanlalmalsawmdawngliana (Sawmtea) S/o F.Kawlkhama, Venglai, Hnahthial chu a pa damlohna avangin vawiin khan rawn hawngin Hnahthial Damdawi In-ah lung lam thalo engemaw zat an en nghal.

 Dr.Sawmtea pa, Pu F.Kawlkhama hi District Hospital Hnahthial-a enkawl mek niin hemi kan tura Dr.Sawmtea rawn hawng hi Medical Officer Dr.Lalrengpuii Ralte ngenna angin vawiin tlai khan Hnahthial khawchhunga Lung lama that lohna neite chu District Hospital Hnahthial-ah koh khawm niin Dr.Sawmtea hian uluk takin a endik hlawm a, damlo te hian kawtkaia Doctor thiam an inentir thei chu lawmawm an tih thu an sawi a ni. Damlo te a enzawh hnu hian vawiin tlai vek khan a pa hi Aizawl-ah a phei pui leh nghal bawk a ni

Hnahthial-a piang leh seilian Dr.F.Vanlalmalsawmdawngliana hi zirna kawngah pawh Primary leh Middle School chu Hnahthial kutchhuak niin a zir tawhna hmunah hian a ti tha thei hle a ni. Baptist Higher Secondary School, Serkawn atanga Class-XII (Science) a zawh hnuin kum 2006 khan MBBS zirturin Mahatma Gandhi Institute of Medical Sciences (MGIMS), Wardha, Maharashtra -ah lutin kum 2011 khan a zo a ni. Hemi hnu hian Synod Hospital Durtlang-ah hun hmangin kum 2014 khan Specialist (MD) ni turin Maulana Azad Medical College, Delhi-ah lut lehin kum 2017 khan tha takin a zo leh a, Christian Hospital Serkawn-ah hun hmang lehin 2019 khan Cardiologist (Super Specialist) ni turin NEIGRIHMS, Shillong-ah zir lehin tunah hian Final year a bei mek a ni. 

Dr.Sawmtea hian Super Specialist a zir hma hian Bungkawn, Aizawl nula Lalrinpuii nen inneiin tunah hian fa 2 an nei a, Mission veng Aizawl-ah an cheng mek a ni.