Tuiphai Group YMA huamhhungah Myanmar Raltlan mi 619 an awm mek

Hnahthial 1st July 2021 : Hnahthial District chhung Tuichang ral khaw hrang hrangah Myanmar rambuaina avanga raltlan mi 619 awm mekin khawtlang mipui ten an theih ang angin tanpuina  pe mahsela inpek sen reng a nih bik loh avangin raltlan thenkhat chu a tul tul thawkin an inhlawh ve hlawm bawk a ni.

Tuiphai Group YMA Secretary Tv.Lalhredika hnen atanga KAILAWN thu dawn danin an huamchhunga raltlan lutte hi kumin 2021 February atang rawn lut ni hlawmin chhungkhat hnai bel an awm laiin belh tur neilo an awm nual thung a, Bualpui H, Thingsai leh New Ngharchhip khawtlang tangrual chuan an khuaa raltlante awmna tur hi an sak sak tih sawiin Central YMA atanga Tuiphai Group YMA-in raltlan tanpuina an hmuh Rs.60500 pawh hun remchang hmasa semchhuak turin ruahmanna an kalpui mek tih a sawi bawk a ni.  Hetiang hi tun dinhmunah Tuiphai Group YMA huamchhunga raltlan awmzat chu a ni :-
1. Cherhlun                         - 25
2. Bethlehem (Cherhlun)    - 30
3. New Ngharchhip            - 150
4. Ngharchhip                     - 46
5. Thingsai                          - 212
6. Bualpui ‘H’                     - 78
7. Khawhri                           - 24
8.Tarpho                               - 40
9. S. Chawngtui                    - 14

Chhungkaw 100 vel awmna khua New Ngharchhip-ah hian raltlan mi 150 vel awm mekin hun engemawchen Thlawhbawk lamah an khaw sak hnuin niminpiah (29.9.2021) khan khawtlang tangrual chuan an chenna tur hi Field thlang lamah In 8 sak sakin an luah lut nghal a ni.
 
KAILAWN zawhna chhangin Pu Lalhruaitluanga, President, YMA Branch New Ngharchhip chuan "harsatna lutuk neilo mah ila a tirah khan Tui chungchangah kan mangang deuh a, chumi avang chuan ram lamah pawh hun engemawchen an han awm kha a ni a, ruahtui a han tlak chhoh takah chuan kan ziaawm ta deuh a ni. Chutihlaiin Tui dah khawlna tur tha an la nei lova Sipauline hmang ten an siam rih a ni" tiin New Ngharchhip khawtlangah raltlante tan hian vawikhat tanpuina an khawn tawh bakah MZP Gen.Hqrs. leh Steering Committee for Myanmar Lunglei  chuan tanpuina an pek thu a sawi bawk a ni.