Hnahthial-a Chanchinbu mi 6 te hnenah Press Accreditation Card hlan an ni

Hnahthial, 6th. July 2021 : Mizoram sorkarin Accredited Journalist atan Hnahthial District atanga mi 6 a thlante hnenah nimin khan District bawrhsap Pu H.Dolianbuaia chuan a Office Chamber-ah Press Accreditation Card awrh tirin mi rintlak leh belhchian dawl ni turin a chah  

Hnahthial District chhungah mi 6 laiin Press Accreditation Card an dawng thei chu lawmawm a tih thu sawiin District Bawrhsap Pu H.Dolianbuaia chuan "Accreditation card dawn hi a namai lova, mi nazawng dawn chi a ni hek lo. A tha zawnga mipuite kaihruai turin sawrkar in a beiseina che u a keng tel a, mi rintlak in ni tih lantirna ani telin nungchang leh in thu chhuahah in fimkhur a tul a, rintlak leh belhchian dawl a ni ngei tur a ni" tiin Chanchinbu chhuah reng chu thil har tak nimahsela Hnahthial-ah ngawrh taka kalpui a ni reng chu lawmawm a tih thu a sawi a, "District hmasawnna tura sorkar hmalakna leh hnathawh hrang hrangte pawh Chanchinbu mite zarah mipui ten awlsam takin an hriat theih phah a ni" ati a. Hripui leng vanga ramin hun harsa a tawh mekah beisei ang diak diaka thil kalpui theihloh chu mipuite'n an hriatthiam a tul thu a sawi bawk a ni.

He hun kaihruaitu Pu Lal-remruata Sailo SDO (Sadar) chuan "District inrelbawlna kawng-ah Media, Admistration leh Police te hi lungthu anga indo khauh tawn tur kan ni tih hi kan hriat a pawimawh hle a ni" tiin kawng hrang hranga Sorkar ruahmanna zawm that leh thawhpui thiam chu a him thu leh a tlo thin thu a sawi a, "Sorkar rorelna zah thiam hi a Pathian thu hle a ni" ati a. Chan-chinbu mite chu Sorkar mite nen an thawhhona chu vawng nung reng thin turin a chah bawk a ni

Pu F.Zosangliana, President MJA Hnahthial pawhin lawmthu sawiin District bawrhsap leh SDO (Sadar) te bakah an staff ten Chanchinbu mite ngai pawimawh taka an puala hun an buatsaih chu MJA Hnahthial chuan a hriatreng tur thu a sawi a, Hnahthial chuan DIPRO hranpa la neilo mahse Lunglei DIPRO leh a staff ten an ngaihven thin-naah leh an buaipui thinna zawng zawngah lawmthu a sawi bawk a ni.

Hnahthial District atanga Mizoram Sorkar-in March 2023 thleng atana Accredited Journalist atana a pawm leh he huna Card a pekchhuah te chu :
1. F.Zosangliana, Editor, Calathea
2. H.Lalthanghuta, Editor, Hnah-thial Times
3. C.Lalbuatsaiha, Editor, Hnah-thial Today
4. Rodingluaia, Editor, Huihchhuk
5. CS.Vanlalthara, Editor, Calathea
6. VL.Liansanga, Editor, Kailawn

 

ASF hrileng vangin Vawk talh, 

Vawk lakluh leh lakchhuah khap a ni

          Hnahthial District chhunga khaw thenkhat -Hnahthial, Tuipui D, Rotlang E, Pangzawl, Denlung, Chhipphir, S.Vanlaiphai leh Darzo te chu African Swine Fever (ASF) in a luhchilh tak avangin heng khua ah te hian AH &Vety Department chuan Vawk talh tur Certificate a pek ngam tawhloh avangin tumahin Vawk talh tawhloh tur a ni tih nimina AH&Vety Hnahthial thuchhuah chuan a tarlang a, hei hian DC Hnahthial Order No. C.31016/4/2019-DC(H) angin Dt.7th August 2021 thleng a huam ang a, a tul chuan pawhsei leh zel theih a nih thu leh dan zawmlo te chu IPC Sec-188 hmanga hrem an nih tur thu tarlan a ni bawk.

        Thuchhuahin a tarlan zel danin tumahin Hnahthial District chhungah khawi hmun atang pawhin Vawk an la lut tur a ni lova, Hnahthial District pawnah vawk an la chhuak tur a ni bawk lo. District chhunga khaw hrang hrangte vawk inlak pawlh leh District chhunga khaw tinah veng danga vawk lakluh leh lakchhuah pawh khap a ni.

 

 MZP Hnahthial-in Kut ziak ngeia Note pek nise an ti  

      MZP Hnahthial chuan nimin khan an President Tv K.Lalzarzova kaihhruaiin an Pisa, Bazar veng-ah Executive Committee meeting an nei a, Kum 2021-2022 session chhungin High school chin chunglam Hnahthial district chhung zirlaite tan a thlawnin Note Xerox kalpui leh nise hemi atan hian Session khat chhungah Rs.100 in registration tih nise chu chu paper man vel hau tak lutuk tur phu-hruk ve theih nana ruahman a ni.
       Hetih rual hian Middle school hnuai lam chu kutziak ngeia note inpek thin nise tiin Hnahthial district huamchhunga School tin Head hnenah ngenna lehkha siam vek nise an ti a ni

       Zirlaite hmasawnna tura theih-tawp chhuahpui thintu Bialtu MLA Dr. R. Lalthangliana chungah MZP Hnahthial chuan an lawmthu meeting-ah hian an sawilang bawk a ni. 

 

 

  

 Hri kai 1 hmuchhuah niin 1 enkawl dam a ni 

District Hospital Hnahthial huamchhungah nimin khan Covid-19 hri kai leh kai loh endik mi 86 awmin heng zinga hnamdang (Vai) pakhat Rawpui a Quarantine lai chu a positive tih hmuh chhuah a ni. Hetih rual hian nimin vek khan CCC Hnahthial-a hri kai enkawl lai pakhat chu enkawldam niin a chhuak a, tun dinhmunah mi 37 hri kai enkawl mek an la awm a ni.