ASF hri vangin Hnahthial-a Vawk farm neitu Pu Zara’n Cheng Nuai 12 chuang hu a chan

 Hnahthial, 5th. July 2021 : Vawk natna hlauhawm tak African Swine Fever (ASF) chuan Hnahthial District chhunga khaw hrang hrang luhchhuah mekin Pu R.Lalzarzova Peniel veng Vawk 57 zet chuan thih phahin a Vawk farm chu tih tawp hial a ni rih. 

Pu R.Lalzarzova te chhungkua hian Hnahthial chhimlam kawt-chhuah Sericulture Farm piahah nikum 2020 August atang khan Vawk Farm siamin bul an tan chho a, awm chilh tumin an mahni chhungkaw chenna In tur an sak mek laiin tunhnai Ni 21.June. 2021 khan an Vawk pakhat chu a chhan leh vang hriat lohin a thi a, hemi hnu lawk Ni 23.June 2021 ah an Vawk dang chu a thih leh avangin ASF hri kai ngei a nih rin a ni a, AH&vety Hnah-thial-a thawktute pawh hriattirin enfiah a ni a, sample te pawh lak a ni. An Vawk dangte pawh hri hian man chho in a thih tak nual avangin hri a darh zel loh nan Vawk dang 44 zet chu tihhlum a ni a, hri avanga ama thi hi 13 ni bawkin Vawk 57 zet an chan a ni.

ASF hrileng avanga Pu Zara te Vawk thi leh tihhlum hi Vawkpui tling 42 inches chunglam, Vawk-pui rai lai 6 nen 18, Inches 30 vel 9 leh a Note 30 an ni a. Tunah hian an Vawk vulh zawng zawng chu a rem vek a ni. Hri avanga Pu Zara Vawk thi zawng zawng hlut zawng hi Rs.Nuai 12 atanga Nuai 15 inkar vel niin chhut a nih bakah a chaw tur Pig Feed an lak khawl bag 50, (Rs.1,10,000/- hu) chu hralh-chhawn chi a nih bawk si loh avangin an chan bawk a ni

Vawk farm an siam atang hian Pu Zara te hian a hlawkna an la tel hman lova, Vawk note 5 an hralh tawh bakah Vawk 3 chiah an la talh hman tih KAILAWN zawhna chhangin a sawi a, "hmalam hun thlirin kan kal tan chauh tihah a han mang vek hi chu a hrilhhai thlak duh hle a ni" tiin bul tan thar leh tur pawhin thla 3 tal chawlh a ngaih dawn  thu leh chumi hnuah pawh an kalpui theih dawn leh dawn loh sawi thiam har a tih thu a sawi a ni.

KAILAWN thu dawn danin nimin thlenga Hnahthial District chhungah hri avanga Vawk thi awm zat chu hetiang hi a ni :
Tuipui D     - Vawk 49
Darzo     - Vawk 5
Leite     - Vawk 1
Chhipphir     - Vawk 55
Pangzawl     - Vawk 6
Rotlang    - Vawk 59
S.Vanlaiphai - Vawk 5
Hnahthial     - Vawk 28 + Pu Zara Vawk 57 = 85