South Tuipui bialtu MLA Dr.Thangtea'n a bial chhunga HSSLC Pass tharte lawmpuina a buatsaih hlanna hun hman a ni

Hnahthial : 28.June. 2021 : MBSE hnuaia Higher Secondary School Leaving Certificate (HSSLC) Examination 2021 result tih chhuah takah South Tuipui bialtu MLA leh Minister ni bawk Dr.R.Lalthangliana'n a bial chhunga pass tharte lawmpuina a buatsaih chu vawiin khan Block-I (Hnahthial) hruaitute chuan an huamchhung a mite hnenah hlanna hun hmangin Pu K.Lalsangluaia, Principal, Govt Hnahthial College chuan hmanpuiin zirlaite fuihna thu a sawi a ni.

He hun hi South Tuipui Block-I MNF President Pu J.Lalchhuana In Bazar veng-ah hman niin Pu B.Lalromawia, Vice President chuan a kaihruai a, Khuallian Pu K.Lalsangluaia chuan Zirlai pass tharte fuihna thu sawiin "Uniform ha lovin college inkal chho dawn a, School anga inkhuahkhirhna a nat loh avangin nun a zalenin mi tam tak tak an tlu fo a, rilru neih a ngaiin tumruh leh ruh lo an inthliar zel a ni" tiin tumruhna leh taimakna chuan engpawh a sithlu thei a, harsatna hian a hneh tak tak theilo tih sawiin zirlaite chu quality ngai pawimawh turin a chah a, "Pawl sang tak leh result tha tak nei, chhawr tlak si loh hi a awmthei a, kan dinhmun ang zela chhawr tlak nih hi hlawhtlinna kawng a nih avangin tih tak takna kan neih thin a tul a ni" tiin bialtu MLA-in lawmpuina a buatsaih Citation leh JF.Laldailova Dictionary a hlan a ni.

He hunah hian Govt Hnahthial College Principal lo ni tawh leh MNF Gen.Hqrs.Adviser ni mek bawk Pu Vanlalhnema pawhin zirlaite chu fuihin "thiam turin zir tam a ngai a, HSSLC in pass hian zirna kawtchhuahah in rawn dak chauh a ni a, hmabak zir tur in la ngahin tumruhna leh taimakna nena in inbuatsaih reng a tul a ni" tiin tumna a san chuan thlen chin pawh a san thin thu a sawi a, Zirlaite chu ruihhlo laka inthiar fihlim turin a chah bawk a ni.

Hriat chinah kumin 2021 hian South Tuipui bial chhung mi leh sa MBSE hnuaia HSSLC pass thar hi mi 218 awmin heng zinga mi 136 te hi Block-I huamchhung a mite an ni a, an vai hian bialtu MLA Dr.Thangtea chuan lawmpuina Citation leh JF.Laldilova dictionary a pe theuh a ni.