Hnahthial District chhunga Vawk 83 thi te ASF hri kai an nih ngei rin a ni

 Hnahthial, 27 June 2021 : Rotlang East khuaah vawiin  khan Vawk puitling 3 chu African Swine Fever (ASF) hrileng vang ni ngeia hriatin a thi a. Vawk puitling dang 4 leh a note 15 pawh hri avanga thi tho tura ngaih niin hri darh zel tur ven nana vuakhlum a ni.  

Hemi hma hian Rotlang East-ah hian ASF vang ni ngeia hriatin Vawk puitling pakhat a thi tawh bawk a ni. Vawiina Vawk thi te hi AH&Vety Hnahthial-a Veterinary Officer Dr.C.Sanghluna chuan a hmunah kalchilhin a enfiah a, sample te la in ASF vanga thi ni ngeia a hriat thu sawiin "a dulthuar, kap leh hrawk vel ah duk kan hmu a. Hei hi ASF pawn lama lanchhuahna pakhat a ni" a ti.

May 2021 hnulamah hian Hnahthial District chhungah ASF vanga thi ni ngeia hriat hi Vawk puitling leh Note 83 awm tawhin heng zingah hian Chhipphir-a Vawk thi 4 te chu ASF tih nemngheh a nih thu Dr.C.Sanghluna chuan a sawi a, Vawk dang thi te pawh hi nemngheh  la nilo mahse ASF ni ngeiin a lan thu a sawi a ni.

Tun dinhmunah Hnahthial District chhung khaw hrang hrangah ASF vanga Vawk thi ni ngeia hriat awmzat chu hetiang hi a ni :-

Hnahthial - 18
Rotlang - 23
Chhipphir - 4,
Tuipui D - 32
Darzo - 5

Heng Vawk thi zinga a tam zawk hi Vawk Putling an ni.