HNAHTHIAL-AH COVID-19 HRI KAI ENKAWL 34 AN AWM MEK

26.06.2021 : Hnahthial District-ah hun engemawchen Covid-19 hri kai an awm loh hnuin niminpiah lawk khan Electric veng Hnahthial-ah chhungkaw pakhata member 4-te chu an positive tih hmuhchhuah niin hri an kaina chin hriat a ni lova, sulhnu chhuina kal zelah vawiin thleng khan Electric veng Hnahthial-ah hian Covid-19 hri kai mi 21 hmuchhuah tawh niin Pi Saizikpuii, Addl.District Magistrate chuan nimin khan Electric veng hi Containment Zone-ah a puang a ni. 

Hnahthial khawpui himna tura Hnahthial hmar lam kawt chhuah a  Thlakhat chuang duty tlaivar kalpuitu Electric veng VLTF chuan an vengin hetiang vanduaina an tawh avang hian kawtchhuaha duty tlaivar chu ti tawp lailawkin an veng chhung hmun hrang hrang 7-ah duty an kalpui nghal a, nitin eitur mamawh neite chu an In ah an pe thin a ni. Hetiang a nih avang hian Hnahthial khawpui a veng hrang hrang te pawh a rehin vawiin (Inrinni) hi Dawr inhawnni nimahsela pawnchhuak leh dawr inhawng a awm mang lo a ni. 

Tun dinmunah Hnahthial District chhungah Covid-19 hri kai leh kai loh endik mi 3826 awm tawhin heng zinga mi 62 te chu an positive tih hmuhchhuah niin mi 29 te chu enkawl dam niin Covid Care Centre an chhuahsan a, heng zinga 2 te hi vawiina chhuak an ni. Midang 34 te chu Covid Care Centre-ah enkawl mek an la ni.