Health Minister Dr.Thangtea'n a bial chhungah Covid-19 dona atan hmanraw hrang hrang District Hospital Hnahthial-ah a pe

Hnahthial, 28 June 2021 : Hnahthial District chu hun engemawchen Covid-19 laka an fihlim hnuin kar hmasa khan khawtual mi 20 chuang hri kai hmuhchhuah thar an nih avangin bialtu MLA leh Health Minister ni bawk Dr.R.Lalthangliana chuan vawiin khan Covid-19 hri dona atana hmanrua pawimawh tak tak te District Hospital Hnahthial-ah pein a bial mipuite chu thlaphang lo turin a chah nghal a ni.

Hmanruate hi Dr.Thangtea hian a aiawh tirin District Hospital Hnahthial-ah hian phurh thlen a ni a, Covid-19 hrileng lakah Hnahthial District a him ta bik lo chu Health Minister Dr.R.Lalthangliana chuan pawi a tih thu a sawi rualin tumah indem lo turin bial mipuite a chah a, "Covid-19 hian tumah a thliar loh avangin kan duh leh tum vang reng ni lovin hri kai thei theuh kan ni a, indem hman kan ni lovin theihtawp chhuah tlangin lungrual taka hri do beihpui hi kan thlak reng a ngai zawk a ni. Chuvangin Sorkar-in tih tur leh tih loh tur a tihte hi thuawih takin i zawm tlang zel ang u" tiin Dr.Thangtea chuan a bial mipuite chu lungngai leh thlaphanga awm lo turin a chah a, thil tul leh mamawhte chu a theih ang angin ngaih tuah zel a tum tih a sawi bawk a ni.

Dr.Thangtea'n District Hospital Hnahthial-a Covid-19 dona hmanrua vawiina a pek te hi PPE full set 300, Sanitizer -100 ltrs. leh Mask (N-95) -100 bakah Sterile gloves leh damdawi chi hrang hrang thahnem tak a ni.

Tun dinhmunah Hnahthial District chhungah Covid-19 hri kai leh kai loh endik mi 3811 awm tawhin chungte chu RAgT-ah mi 2169, TrueNat-ah mi 1394 leh RT-PCR-ah mi 248 te an ni. Heng zingah hian mi 63 te chu Covid-19 hri kai tih hmuhchhuah niin mi 29 enkawl dam an ni tawh a, hri kai enkawl lai mek hi 34 an la awm mek a ni. Hnahthial District-a Covid-19 hri kai 63 zinga a tam zawk mi 35 te hi tun thla (June 2021) chhunga hmuchhuah te an ni