PHED Hnahthial-in Tuichang an pump-na Current line chhia hmuhchhuah a ni ta

 Hnahthial mipuite chawm nana PHED in Tuichang tui an pump-na Current line chhia chu thla chanve (Ni 15) a nihna nimin khan hmuchhuah niin siamthat nghal a ni a, nizan khan Tui pawh pump in vawiin hian dan pangngai angin semchhuah tan leh a ni ang.

PHED Hnahthial-in Tuichang an pump na Current line hi Ni 13. 7.2023 zan khan chiangkuang lo thutin Tui hi an pump thei lo nghal a ni. Thawktu ten a chhiatna lai hi theihtawp chhuaha an zawng chungin an hmu thei lova, P&ED Hnahthial-a thawktute leh Lunglei a PHED a thawktute pawhin an pui hial a ni. Ram hnuaia Electric hrui kalna pawh vawi 5 vel zet zawh chhuakin Current an lak luhna ban zawng awnga Disc pawh an thlak vek hman a ni.

Hetih lai hian Pump House-ah hian Current hi lut tho in Fridge leh thil dangah pawh an hmang thei a, Tui pump nana khawl an ON chiahin a trip zel thung a, Generator hmangin Tui hi an pump thei tho si a ni.

He harsatna sutkian pui tur hian nimin khan Pu Jonathan Pulamte Electrician PHED, Siatual Sub-Division chuan Hnahthial rawn thlengin a ho hian endik hnathawh nghal a ni a, Pump Station a Transformer atanga Current pekchhuah dan an endik laiin line-ah hian rawn puak tek tek awmin a that lohna hi hmuh chhuah niin thlak nghal a ni a, nizan atang khan an pump leh thei ta a ni

PHED Hnahthial EE Pu Darthangvunga chuan an harsatna leh manganna ti kiang tura theihtawp chhuahtu a thawhpui zawng zawngte chungah lawmthu sawiin SDO leh JE te inpekna leh ruahmanna fakawm a tih thu te, Saitual leh Lunglei atanga rawn puitu te leh P&ED Hnahthial a thawktute chungah thinlung tak a lawm thu a sawi a, "Hnahthial mipuite pawhin kan harsatna tawh min hriathiam sak a, phunnawi lo leh dawhthei takin min ngaichang a, NGO lam pawhin puih kan ngaihna zawnah an inhawn thu min hrilh te kha kan lawm tak zet a ni" a ti.  

Vawiin hian hengah te hian Tui sem tum a ni
1. Peniel - Pu Pawla point, BDO Quarters point, Pu Valbuanga point.
2. Chanmari
3. Baazar : Bazar shed point, Atta lane, Gate Tlang, Pu Mahminga point.
4. Electric : Pi Rokungi point, Kudam veng, BRTF point, Haulawng road.