Hnahthial District chhunga Myanmar Raltlan te hnenah dan leh hrai hrilh hria
Superintendent of Police Hnahthial ruahmanna angin Hnahthial District chhung khaw hrang hranga Myanmar Raltlan awm mekte hnenah nimin leh niminpiah khan dan leh hrai chi hrang hrang - IPC, Cr.PC, Mv Act leh Hmeichhiate leh naupangte humhalhna chungchang inhrilh hriatna leh inzirtirna (Legal Awareness Campaign) neih a ni.
Hnahthial Police-te hi Team 2-ah insiamin Pu Bijoy Gurung Addl.SP leh Pu Vanlalbiaka Joute SDPO ten an hova New Ngharchhip, Ngharchhip, Bualpui H, Cherhlun, Thingsai, Tarpho leh Khawhri khua a Raltlan awm mekte chu kalchilhin thlamuang taka awm tur leh India rama an awm chhung chuan India dan leh Sawrkar thupek te zawm theuh turin an hrilh bakah Covid-19 hrileng laka an inven nan face mask leh Hand sanitizer an sem nghal bawk a ni. Hnahthial Police-te hian thla kalta (October 2021) pawh khan Hnahthial khawchhunga Raltlan awmte hnenah Dan leh hrai inhrilhhriatna hi an lo hmang tawh bawk a ni
Helipad-a Thingphun bul vel samfai hnatlang thawk dawn
Hnahthial khawpui chhunga Faina leh Thianghlimna beihpui thlak kal mekah Green Mizoram Day 2021 puala Department/Institution/NGOs/Media ten Helipad-a an thingphunte leh pangpar phun te enkawl zui leh a hmunhma samfai leh turin District bawrhsap chuan naktuk (Zirtawpni) chawhnu dar 1:00 ah hnatlang nei turin a hriattir a, hetiang hian ruahmanna siam a ni :-
2. Hemi ni hian kan thingphunte kan tihfai mai bakah Leitha ngaihtuah a thingphun te pe theuh tur a beisei kan ni.
3. Hemi ni hian a veng neitu Village Council leh YMA Branch atangin Hnatlangpui ah hian mi 5 aia tlem lo tel ve tur a beisei an ni.
4. Hnatlangpui ni hian Florists Association memberte a tam thei ang ber Hnatlang tur a beisei an ni.
5. Refreshment leh tul dang chu DUDO, UD&PA Hnahthial-in a ruahman ang.
Faina kawnga hmalakna-ah Model veng tanrualna a lang
Hnahthial-a veng hrang hrangte chuan an veng chhung tih fai leh cheimawi kawngah chak takin hmalakna an kalpui chho zel a, Model veng chuan Sanitation & Beutification Committee kaihhruaina hnuaiah ruahmanna siamin theihtawp chhuah zel an tum
Model veng chhunga VC leh NGO hrang hrangte telna Sanitation & Beutification Committee chu an Chairman leh VC ni bawk Pu B.Lalbikkima kaihhruaiin an Branch YMA In-ah nizan khan thukhawmin hmalak dan tur an sawi ho a, VC,YMA leh MHIP te chuan pawisa thawkhawmin Rs.21,000 a tlingkhawm a, hei hi an Branch YMA hnuaia Section pathum- Dohawla, Lianthiauva leh Vanhnuaithanga Section-ah Rs.6500 theuhin an hmalakna atan an sem a ni. An veng chhung hmun ualau deuh leh kawng tana hnawk lo chinah te Pangpar chinna tur siam leh retaining wall chei te an tum a ni. Section hrang hrangte hian Tuichang Tiau lung leh Balu la in chungte chu vengchhung chei nan hian an hman dawn bakah mimalin mahni in bul chei nan an hmang duh a nih pawhin a thlawna hman an phalsak bawk a ni.
Hnahthial District-ah Covid-19 hri kai enkawl mi 165 awm mek
Hnahthial District chhunga Covid-19 hri kai enkawl lai mi 38 te chuan nimin khan dam takin enkawl an nihna hmun an chhuahsan a, hri kai leh kai loh endik mi 81 zingah mi 15 te chuan hri an kai tih hriat thar a ni a, chungte chu Peniel - 2, Muallianpui - 3 leh Leite - 10 an ni. Heti hian tun dinhmunah Hnahthial District-ah Covid-19 hri kai enkawl mi 165 an awm mek a ni.
Nikum 2020 April atanga Hnahthial District chhunga sample lak leh endik, Covid-19 hri kai hmuchhuah tawh zat chu hetiang hi a ni :-
Comments
Post a Comment